छाडा छोडिएको भैँसीले बाटो काट्दा भयो दुर्घटना, ४ सवारी सहित पाँच जना घाइते

विराटनगर: विराटनगर महानगर पालिका वडा नं १४ स्थित मलाया रोडमा भैंसीसँग ठोक्किएर ४ सवारी दुर्घटना हुँदा पाँच जना मानिस घाइते भएका छन् ।

मंगलबार साँझ विराटनगर–१४ स्थित मलाया रोडमा साँझ सवा ६ बजेको समयमा एक अनौठो श्रृंखलाबद्ध दुर्घटना भयो, जसमा एउटा भैंसी, दुई मोटरसाइकल, एक जीप र एक कार संलग्न थिए।

प्रहरीका अनुसार, घटनाक्रम एउटा छाडा भैंसीले सडक पार गर्न खोज्दा सुरु भयो। सुरुमा भैंसीसँग बा ११ च ४४५० नम्बरको सेतो रंगको एउटा जीप ठोक्कियो, जसले गर्दा भैंसी सडकमा लड्यो। त्यसपछि, पहिलो घटना भएको केही समय पछाडि लडेको भैंसीमाथि बा २९ च २६१८ नम्बर भएको नीलो रंगको एउटा कार र को २५ प ६३८७ र को ११ प २९०९ नम्बरको दुई वटा मोटरसाइकलहरू ठोक्किए।

उक्त घटनामा मोटरसाईकलमा सवार विराटनगर–१८ निवासी देवानन्द यादव र उनकी श्रीमती अनिताराजलक्ष्मी यादव, विराटनगर–९ ट्राफिक चोक निवासी राज गुप्ता, र कारमा सवार दुई जना मो.हलिम र रिचा जैन घाईते भएका थिए । उनीहरूलाई तत्काल विराटनगर स्थित न्यूरो अस्पतालमा उपचारको लागि लगिएको थियो। हलिम र जैनलाई सामान्य उपचारपछि डिस्चार्ज गरिएको छ भने अन्य तीन जना घाइतेहरूको उपचार जारी रहेको इलाका प्रहरी कार्यालय रानीले जनाएको छ।